«Иэйэр кутум кэрэ эйгэтэ» — Анна Еремеевна Олесова
Тохсунньу 24 күнүгэр, Саха сиригэр “Культура”, Никольскай нэһилиэгэр «Дьоҕур» сылларын чэрчитинэн Е.И. Бубякина аатынан «Күндүл» норуот айымньытын дьиэтигэр Никольскай нэһилиэгин олохтооҕо, талба талааннааҕа, Никольскай нэһилиэгин Ытык киһитэ, «Нэһилиэк Социальнай-экономическай сайдыы» бэлиэ, Нам улууһун 2025с. «Бастыҥ ийэ» анал аат хаһаайката Анна Еремеевна Олесова «Иэйэр кутум кэрэ эйгэтэ» диэн айар киэһэтэ киэҥ далааһыннаахтык ыытылынна.Персональнай уникальнай выставката үөрүүлээх быһыыга -майгыга арыллан, дьонун — сэргэтин көрүүтүгэр туруоран дьон сөҕүүтүн, биһирэбилин, махталын ылла.
Иис алыбыгар ис дууһатыттан ылларбыт уус-уран тарбахтаах, элбэх дьоҕурдаах, баай опыттаах иистэнньэҥ Анна Еремеевна халадаай былаачыйалары, кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, сэлээппэлэри, дьэрэкээн өҥнөөх оҕуруонан араас киэргэллэри-симэхтэри, чаппараахтары о.д.а. баай ис хоһоонноох быыстапканы бэлэмнээн көрдөрүүгэ таһаарда.
Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр. Иистэнэрин таһынан дьиэтин бэйэтэ оҥорбут-туппут тупсаҕай оҥоһуктарынан сиэдэрэйдик киэргэтэр.
Кини сатабыллаахтык лобзигынан туттан фанераттан дьиэтигэр олус бэртээхэй быыс, олбуорун иһин киэргэтэн араас кыыллары оҥорбута, ураннаан оҥорбут чаппараахтара, дьэрэкээн киэргэллээх таҥас сабыылара, дьыбаан сыттыктара көрбүт эрэ киһи хараҕын үөрдэллэр.
Тэрээһини Никольскай нэһилиэгин Аҕа баһылыга Уйгу Сайаан Айхан уола истиҥ эҕэрдэ тылынан арыйда, Анна Еремеевнаҕа «Никольскай нэһилиэгин Норуот айымньытыгар кылаатын иһин» бэлиэни туттарда итиэннэ Нам улууһугар «Дьиэ кэргэн экономикатын» сылыгар дьүөрэлээн Никольскай нэһилиэгэр анаммыт «Дьоҕур» сылыгар саҥаттан-саҥа дьоҕурдаах дьон албан ааттара ааттана, бэлиэтэнэ туруо диэн киэн туттан эттэ. Нам улууһун культура уонна духуобунай сайдыы управлениетын салайааччыта Семен Прокопьевич Ядрихинскай “Нам улууһун норуотун маастара” аат дастабырыанньатын үөрүүлээх быһыыга-майгыга туттарда. “Нам оройуона” муниципальнай тэриллии депутаттарын сэбиэтин председателя Алексей Иванович Винокуров, Нам улууһуттан Никольскай нэһилиэгин депутата Павел Гаврильевич Иванов истиҥ эҕэрдэ тылларын эттилэр. Никольскай нэһилиэгин тэрилтэлэрэ, «Сайдыына» кулууп иистэнньэҥнэрэ, Анна Еремеевна төрөппүт оҕолоро эҕэрдэлээтилэр, сибэкки дьөрбөтүн бэлэх ууннулар.
А. Е. Олесова айар киэһэтигэр иис-уус кистэлэҥнэрин үллэһиннэ, айар үлэтин былааннарын кэпсээтэ-сэһэргээтэ.
Тэрээһини «Күндүл» НАДь үлэһиттэрэ тэрийэн, иилээн – саҕалаан ыыттылар. «Намыына», «Ыйдаҥа» ансаамбыллара ылбаҕай ырыаларынан, кэрэ үҥкүүлэринэн киэргэттилэр, А. Олесова тикпит таҥастарын кэтэн сценаҕа хааман дьон дьүүлүгэр көрдөрдүлэр, сэргэхситтилэр.
Тэрээһин түмүгэр Олесовтар дьиэ кэргэн минньигэс астаах фуршетынан күндүлээтилэр. Дьиэ кэргэн аҕа баһылыга Анатолий Васильевич «Тэрээһин үрдүк таһымҥа ааста», диэн астыммытын биллэрдэ, тэрээһини ыытыыга үлэлэспит дьоҥҥо истиҥ махтал тылларын эттэ.
Киэн туттар иистэнньэҥмит, Анна Еремеевна «Норуот маастарын» аатын ылбытынан ис сүрэхтэн эҕэрдэлиибит. Тарбаҕын талаанынан, мындыр ииһинэн дьонун-сэргэтин өссө да үөрдэ туруо диэн эрэнэбит.
