«Күүлэй — 2025» төрүт үгэһи салгыыр от охсуутун күрэҕэ (из архива новостей)
От ыйын 18 күнүгэр 2025 с. Никольскай нэһилиэгэр Аҕа дойду Улуу сэриитин бэтэрээнэ, чулуу үлэһит, стахановец, ХХ үйэ илиинэн оттооһуҥҥа чемпиона Василий Иннокентьевич Охлопков — Түөһэй Баhылай 110 сааhыгар аналлаах саха хотуурунан от охсуутугар «Күүлэй-2025» өрөспүүбүлүкэтээҕи күрэх ыытылынна. Тэрээһин чэрчитинэн Никольскай нэһилиэгин саҥа кыбаарталыгар кини аата иҥэриллибит уулуссаҕа ытык-мааны киһи сырдык аатын үйэтитэр мемориальнай дуоска үөрүүлээх быһыыга-майгыга аһылынна. Мустубуттары тыа сирин түөлбэтэ — Никольскай нэһилиэгин баһылыга Уйгу Сайаан Айхан уола, улуус баһылыгын солбуйааччы Филипп Николаев, улуустааҕы бэтэрээннэр сэбиэттэрин бэрэссэдээтэлэ Софья Кобякова, оҕолорун ааттарыттан Зинаида Нератова уо.д.а. истиҥник эҕэрдэлээтилэр.Күрэх үөрүүлээхтик сахалыы алгыһынан аһылынна, саха хотуурунан от охсуутун дьүһүйүүнэн ситэрилиннэ. Саха хотуурунан от охсуутун тилиннэрэр күүлэйи, бэлиэ тэрээһин кыттыылаахтарын улуус баһылыгын солбуйааччы Филипп Николаев эҕэрдэлээтэ. Төрүт үгэһи салгыыр от охсуутун күрэҕин кыттыылаахтарыгар ситиһиилэри баҕарда.Күүлэй түһүлгэтигэр «Хотуур — тэлэр дьарыгым» быыстапка турда.«Күүлэй-2025» күрэҕин кыттыылаахтарын, мустубут көрөөччүлэри Нам улууһун култуураҕа управлениетын салайааччыта Семен Ядрихинскай эҕэрдэлээтэ, саха үгэһинэн күүлэй сүрүн бирииһигэр ынах этин спонсордаан туруорбут ытык-мааны В.И. Охлопков-Түөһэй Баһылай оҕолоругар, сыдьааннарыгар махталын тиэртэ, күрэхтэһии кыттыылаахтарыгар ситиһиини, кыайыыны- хотууну баҕарда.Күрэх кыттааччыларын ортолоругар бааллар: Хамаҕаттаттан Руслан Захаров, Октябрь Герасимов, 1 Хомустаахтан Андрей Винокуров, Үөһээ Бүлүүттэн Егор Тумусов, Нам с. Рустам Федоров, кини уола Саян Федоров уонна Дьокуускайтан Семен Кривогорницын.Күрэхтэһээччилэр саха хотуурунан от охсуутугар туттар кистэлэҥнэрин көрдөрдүлэр уонна саха уустара тимири уhаарыыга уонна охсууга былыргы ньымалары тутталларын көрдөрдүлэр. Күүлэй туонатыгар улууспут тимир уустара Үөдэйтэн аҕалыллыбыт тааһы (руданы) анал оһоххо уһаардылар.Тимир уустара 14 кг. руданы 4 чаас устата уһааран, 2 кг. 800 гр. болгуону ылбыттарын көрөөччүлэр уруйдуу көрүстүлэр. Тимир уустара болгуону И.С. Шарапов аатынан Никольскайдааҕы сири туһаныы музейыгарэкспонат быһыытынан директорга Прасковья Протопоповаҕа туттардылар. Уустар бэйэлэрэ оҥорбут, 1500 кыраадыска тиийэ итийэр оһоххо уһааран болгуону таһаардылар. Күөн күрэс түһүлгэтигэр илии-атах оонньуутугар, сааһыттан тутулуга суох, баҕалаахтар суруйтаран халбас харата хапсаҕайга хапсыстылар, мас тардыһан быыппаһыннардылар. Кыра оҕолор эмиэ холостулар.Хапсаҕайга 1 м.- Федоров Саян, 2 м. — Герасимов Октябрь, 3 м.- Колмогоров Артем, мас тардыһыыга 1 м.- Баишев Михаил, 2 м. — Местников Аял, 3 м. — Сивцев Прокопий ситистилэр. Бары мүһэлэринэн, сыаналаах бириистэринэн наҕараадаланнылар. Күүлэйи тэрийээччилэр олохтообут анал бириистэрин хаһаайыннарынан ааттаннылар:-“Бастыҥ ыраас суоллаах охсооччу” — Герасимов Октябрь (Хамаҕатта). -“Бастыҥ хотуур ууһа” — Михайлов Александр (Нам). -“Төрүт тимиртэн хотуур бастыҥ ууһа”- Чап ууһа Тумусов Егор (Үөһээ Бүлүү). -“Күүлэй бастыҥ отуута” — Федоровтар дьиэ кэргэн (Намнааҕы музей). Бары Добун суругунан, ноутбугунан наҕараадаланнылар. Оттон «Эдэр кэскиллээх от охсооччу» анал аат хаһаайына Федоров Саян (Нам) Никольскай нэһилиэгин анал бирииһин тутта.
